RAIS SAMIA AFUNGUA MKUTANO MKUU WA AFRICA50 NA KUTANGAZA MAGEUZI YA KIKANDA KUPITIA SEKTA BINAFSI

 

Wakati Dar es Salaam ikisimama kama kitovu kikuu cha maamuzi ya kiuchumi barani Afrika, Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, amefungua rasmi Mkutano Mkuu wa Wanahisa wa Taasisi ya Africa50 na Jukwaa la Miundombinu Afrika katika Kituo cha Mikutano cha Kimataifa cha Julius Nyerere (JNICC).

Mkutano huo unawakutanisha wakuu wa nchi na serikali, viongozi wa taasisi za fedha za kimataifa, wanahisa wakubwa, na washiriki zaidi ya 1,200 kutoka ndani na nje ya bara hilo katika mkutano wenye uzito mkubwa unaolenga kuchochea mtaji wa Kiafrika na kujenga mustakabali thabiti wa kiuchumi kupitia uwekezaji shirikishi katika miundombinu.

Akizungumza mbele ya viongozi hao wazito wa kimataifa na wa ndani ya bara, Rais Samia ameweka wazi msimamo thabiti wa serikali yake kuwa bajeti na rasilimali za umma pekee haziwezi kutosheleza kasi ya mageuzi ya kiuchumi inayohitajika, ndio maana Tanzania imeiweka sekta binafsi kuwa mhimili mkuu unaolengwa kuchangia asilimia 70 ya ukuaji wa uchumi wa taifa, huku jukumu la serikali likiwa ni kuendelea kujenga mazingira rafiki, thabiti na yanayotabirika kwa uwekezaji ili kuwawezesha wawekezaji wa ndani na wa kimataifa kuleta ubunifu na kukuza biashara bila vikwazo.

Kiongozi wa nchi amesema kuwa katika miaka ya hivi karibuni, Tanzania imewekeza kwa nguvu katika miradi mikubwa na ya kimkakati ya miundombinu ikiwemo upanuzi na uboreshaji wa Bandari ya Dar es Salaam, ujenzi wa Reli ya Kisasa (SGR), pamoja na mtandao mpana wa barabara, madaraja, na korido za usafirishaji zinazounganisha nchi na masoko ya kikanda, hatua inayolenga kupunguza gharama za usafirishaji, kuongeza ufanisi wa kibiashara, na kuimarisha nafasi ya kipekee ya Tanzania kama lango kuu la biashara linalounganisha uchumi wa Afrika na dunia nzima.

Alisisitiza umuhimu wa ushirikiano wa kikanda na umiliki wa rasilimali za ndani, Rais Samia ameeleza kuwa kufanyika kwa mkutano huo mkubwa nchini Tanzania hakuthibitishi tu imani ya wawekezaji duniani katika mageuzi ya kiuchumi yanayoendelea nchini, bali pia kunatoa ujumbe thabiti kuwa mustakabali na maendeleo ya bara la Afrika vinapaswa kuongozwa na maono ya Kiafrika, mtaji wa Kiafrika, na mshikamano mkakamavu wa mataifa ya bara hili katika kujenga masoko yaliyounganishwa na yenye tija kwa wananchi wote.

Rais Samia pia alitoa mwaliko rasmi kwa viongozi na wageni hao wa kimataifa kutenga muda wa kujionea ukarimu wa Watanzania na utajiri mkubwa wa vivutio vya utalii vilivyopo nchini, kuanzia tambarare za Serengeti na Mlima Kilimanjaro hadi visiwa vya kihistoria vya Zanzibar, huku akirejelea ahadi ya serikali ya kuendelea kuboresha sera na mazingira ya uwekezaji ili kuhakikisha kila mwekezaji anufaike na fursa lukuki zinazopatikana ndani ya ardhi ya Tanzania.