Serikali imepanga kuunda Tume ya Maridhiano ili kuharakisha mchakato wa marekebisho ya Katiba wakati Tume ya Uchunguzi wa Jinai ikendelea na majukumu yake, ambapo hatua hiyo ilitangazwa na Rais Samia Suluhu Hassan alipozungumza na viongozi wa vyama vya siasa Ikulu jijini Dar es Salaam na kueleza kuwa tume hizo mbili zitafanya kazi kwa wakati mmoja kwa kuwa zinafanya mambo yasiyohusiana.
Kufuatia azma hiyo, viongozi wa siasa na serikali wastaafu wametoa maoni yao wakisisitiza umuhimu wa tume hiyo kuwa shirikishi na inayozingatia maslahi ya taifa ili kuponya majeraha ya kisiasa na kulinda amani ya nchi.
Mwanasiasa mkongwe, Anna Abdallah, amesema anaamini tume hiyo itakuwa bora chini ya uongozi wa Rais Samia ambaye ni kinara wa maridhiano na utekelezaji wa sera ya 4R, huku akisisitiza kuwa wananchi wampe nafasi Rais aunde tume hiyo ili ianze kazi na kupokea maoni ya wananchi kutoka rika na vyama mbalimbali.
Anna ameeleza kuwa anatamani kupitia maridhiano hayo kuwepo kwa utamaduni wa viongozi na wananchi kuvumiliana licha ya kutofautiana mawazo, akisisitiza kuwa kutokubaliana kusiwe chanzo cha ugomvi bali kuwe na utamaduni wa kupingana bila kupigana huku maslahi ya nchi na uzalendo vikipewa kipaumbele kuliko matakwa binafsi.
Kwa upande wake, kiongozi mstaafu wa Chama Cha Mapinduzi na Serikali, John Chiligati, amesema anatamani wajumbe watakaoteuliwa wawe na hekima, busara na uzalendo wa dhati wa kulirudisha taifa kwenye umoja na mshikamano bila kutanguliza maslahi binafsi.
Chiligati amesisitiza kuwa muundo wa tume hiyo unapaswa kuwa shirikishi kwa kujumuisha vijana, wazee, na watu kutoka sekta na vyama mbalimbali kwa sababu athari za uchaguzi ziliwakumba makundi mbalimbali ya jamii na si wanasiasa pekee
Posts
No comments:
Post a Comment