HII NDIYO AWAMU YA SITA, INAYOTUMIA SAYANSI NA TEKNOLOGIA KUHAKIKISHA UCHUMI ENDELEVU

Hii ndiyo Awamu ya Sita, inayotumia sayansi na teknolojia kuhakikisha uchumi endelevu

Katika Awamu hii ya Sita, simulizi ya hali ya hewa nchini Tanzania imebadilika kutoka kutabiri mvua na kuwa mlinzi wa mfuko wa mwananchi. Hali ya hewa huathiri karibu kila uamuzi wa maisha yetu—kuanzia usalama wa chakula hadi uimara wa biashara. Lakini safari hii, Serikali imewekeza nguvu kubwa kuhakikisha kuwa mabadiliko ya tabianchi hayatetereshi uchumi wa mtu mmoja mmoja wala ustawi wa Taifa.

Chini ya uongozi wa sasa, Mamlaka ya Hali ya Hewa Tanzania (TMA) imefanyiwa uwekezaji mkubwa wa miundombinu na utaalamu.

Mkurugenzi wa TMA, Dk. Ladislaus Chang’a, anabainisha kuwa lengo sasa ni kuwa Mamlaka bora zaidi barani Afrika.

Mapinduzi makubwa yapo kwenye utabiri unaozingatia athari. Badala ya kusema tu kutanyesha mvua, wataalamu kama Renatus Kapenda wanasisitiza kueleza nini kitatokea kwenye maeneo husika ili wananchi na taasisi wachukue hatua kabla ya majanga kutokea. Huu ni ulinzi wa rasilimali na mali za watu.

Serikali sasa imeunganisha taarifa za hali ya hewa kwenye mipango mikuu ya maendeleo, ikiwemo Dira ya Taifa 2050 na Mpango wa Maendeleo wa Miaka Mitano (FYDP). Hii inamaanisha kuwa miundombinu kama barabara na madaraja sasa yanajengwa kwa kuzingatia utabiri wa muda mrefu ili yasibomoke kirahisi.

Aidha Ofisi ya Waziri Mkuu (Maafa) na Idara ya Usalama wa Chakula sasa zinafanya kazi bega kwa bega na TMA ili kuzuia madhara kabla hayajatokea.

Kutokana na umoja na usahihi wa taarifa hizi unamaanisha kuwa mkulima hapotezi mbegu, mfanyabiashara hapotezi mzigo njiani, na Serikali haipotezi bajeti yake kwenye majanga yanayozuilika. Hii ndiyo Awamu ya Sita—kutumia sayansi na teknolojia kuhakikisha uchumi wa Mtanzania unakuwa salama na endelevu.